FREE LPG CONNECTION
Ujjwala Scheme || వంట గ్యాస్ సిలిండర్ ప్రజా జీవితంలో పెను మార్పులు తీసుకొచ్చింది. దేశంలో చాలా మంది పేదలు వంట కోసం ఇప్పటికీ కట్టెలు, బొగ్గుల పొయ్యిలపై ఆధారపడుతున్నారు. పేద కుటుంబాలకు వంట గ్యాస్ సిలిండర్ అందించేందుకు కేంద్ర ప్రభుత్వం 2016లో ప్రధాన మంత్రి ఉజ్వల యోజన ప్రారంభించింది. ఈ పథకం కింద అర్హులకు గ్యాస్ కనెక్షన్ ఉచితంగా ఇవ్వడంతో పాటు రూ.550కే ఎల్పీజీ సిలిండర్ అందజేస్తారు. ఏడాదికి 12 సిలిండర్లు పొందవచ్చు. ఉజ్వల పథకం అర్హతలు, దరఖాస్తు విధానం, పూర్తి వివరాలు..
ప్రధాన మంత్రి ఉజ్వల యోజన (PMUY) అంటే ఏమిటి?
పేద కుటుంబాలకు, ముఖ్యంగా గ్రామీణ ప్రాంతాల్లోని మహిళలకు శుభ్రమైన వంట ఇంధనాన్ని (LPG) అందించడం ‘ప్రధాన మంత్రి ఉజ్వల యోజన పథకం’ ముఖ్య ఉద్దేశం. ఈ పథకం కింద లబ్ధిదారులకు రూ.550కే గ్యాస్ సిలిండర్ అందజేస్తారు. ఏడాదికి 12 సిలిండర్లు ఇస్తారు. పొగతో నిండిన కట్టెల పొయ్యిల నుంచి విముక్తి పొందడమే కాకుండా, ఆరోగ్యాన్ని కాపాడుకునేందుకు ఈ పథకం దోహదం చేస్తుంది. 2016 మే 1న ప్రధాన మంత్రి నరేంద్ర మోదీ.. ఉత్తరప్రదేశ్ రాష్ట్రంలోని బల్లియాలో (Ballia) ఉజ్వల యోజన పథకాన్ని ప్రారంభించారు.
ఉజ్వల యోజన కింద మొదటి దశలో దేశంలో 10 కోట్ల గ్యాస్ కనెక్షన్లను ఇచ్చారు. రెండో దశలో (UJJWALA 2.0) డిసెంబర్ 2024 వరకు 2.34 కోట్ల గ్యాస్ కనెక్షన్లు ఇచ్చారు. ప్రస్తుతం దేశవ్యాప్తంగా ప్రధాన మంత్రి ఉజ్వల యోజన పథకం ద్వారా 12 కోట్లకు పైగా కుటుంబాలు లబ్ధి పొందుతున్నాయి.
వంట గ్యాస్ సిలిండర్ రాకతో సమాజంలో ఊహించని మార్పులు వచ్చాయి. వంటల్లో వేగం పెరిగింది. కట్టెల పొయ్యితో బాధ, పొగతో వచ్చే అనారోగ్య సమస్యలు తప్పాయి. ఎల్పీజీతో ఇన్ని ప్రయోజనాలున్నా.. పేదరికం కారణంగా ఇప్పటికీ చాలా మంది కొనుగోలు చేయలేకపోతున్నారు. దీనికి తోడు వంట గ్యాస్ సిలిండర్ ధరలు భారీగా పెరిగాయి. పేద కుటుంబాలకు గ్యాస్ సిలిండర్ను చేరువ చేసేందుకు, వారి ఇంటి ఖర్చుల భారాన్ని తగ్గించేందుకు కేంద్ర ప్రభుత్వం ప్రవేశపెట్టిన పథకం ప్రధాన మంత్రి ఉజ్వల యోజన (Pradhan Mantri Ujjwala Yojana). ఈ పథకం కింద వంట గ్యాస్ సిలిండర్ను సబ్సీడీకి అందిస్తున్నారు. ఎల్పీజీ సిలిండర్ ధర రూ. 900 దాటగా.. కేంద్ర ప్రభుత్వం రూ. 550కే గ్యాస్ సిలిండర్ను అందిస్తోంది. ఈ పథకానికి ఎవరు అర్హులు? ఎలా దరఖాస్తు చేసుకోవాలి? ఏడాదికి ఈ పథకం కింద ఎన్ని సిలిండర్లు ఇస్తారు? తదితర పూర్తి వివరాలు ఇక్కడ తెలుసుకోండి.
పొగ కష్టాలను తప్పించిన పథకం
కట్టెలు, బొగ్గులు, పిడకలు ఉపయోగించి వంట చేసేటప్పుడు విషపూరితమైన పొగ వెలువడుతుంది. నిత్యం ఈ పొగను పీల్చుకోవడం వల్ల మహిళలు, చిన్న పిల్లలు అనారోగ్యానికి గురయ్యేవారు. ఉజ్వల యోజన పథకం అర్హులైన ప్రజలకు గ్యాస్ స్టవ్, సిలిండర్, ఇతర సామాగ్రిని ఉచితంగా అందిస్తూ లక్షలాది కుటుంబాల్లో వెలుగులు నింపుతోంది.
ప్రధానమంత్రి ఉజ్వల యోజనలో ఎంత డబ్బు వస్తుంది?
| ఆర్థిక సహాయం | 14.2 KG సిలిండర్ | 5 KG సిలిండర్ |
| సెక్యూరిటీ డిపాజిట్ | రూ. 1850 | రూ. 950 |
| రెగ్యులేటర్ | రూ. 150 | రూ. 150 |
| LPG హోస్ | రూ. 100 | రూ. 100 |
| గృహోపకరణ గ్యాస్ వినియోగదారు కార్డు | రూ. 25 | రూ. 25 |
| భద్రతా తనిఖీ రుసుము | రూ. 75 | రూ. 75 |
| మొత్తం ఆర్థిక సహాయం | రూ. 2200 | రూ. 1300 |
ప్రధాన మంత్రి ఉజ్వల యోజనకు అర్హతలు:
- లబ్ధిదారు మహిళ అయుండాలి, భారతీయ పౌరురాలు అయి ఉండాలి.
- వయస్సు 18 సంవత్సరాలు, అంతకంటే ఎక్కువ ఉండాలి.
- షెడ్యూల్డ్ కులాలు లేదా షెడ్యూల్డ్ తెగల కుటుంబం అయి ఉండాలి.
- దారిద్య్ర రేఖకు దిగువన ఉన్న కుటుంబం (BPL) అయి ఉండాలి.
- ప్రధాన మంత్రి ఆవాస్ యోజన గ్రామీణ్ లబ్ధిదారు అయి ఉండాలి.
- అంత్యోదయ అన్న యోజన (AAY) లబ్ధిదారు అయి ఉండాలి.
- ఈ పథకం కింద పేర్కొన్న 14 పాయింట్ల డిక్లరేషన్ సమర్పించాలి.
ప్రధాన మంత్రి ఉజ్వల యోజన ప్రయోజనాలు:
- ఉజ్వల యోజన కింద గ్యాస్ కనెక్షన్ ఉచితంగా వస్తుంది.
- గ్యాస్ సిలిండర్ కూడా రూ. 550కే లభిస్తుంది.
- కనెక్షన్ పెట్టినప్పుడు తొలి LPG సిలిండర్ రీఫిల్ ఉచితంగా ఇస్తారు.
- కొత్త కనెక్షన్ తీసుకున్నవారికి 14.2 కిలోల సిలిండర్కు రూ.2200 ఆర్థిక సహాయం, 5 కిలోల సిలిండర్కు రూ. 1300 ఆర్థిక సహాయం లభిస్తుంది.
- దీంతో పాటు లబ్ధిదారులకు వడ్డీ లేని రుణం కూడా లభిస్తుంది. ఈ రుణం ద్వారా LPG స్టవ్ కోసం డబ్బు (1 బర్నర్ స్టవ్ కోసం రూ.565 & 2 బర్నర్ స్టవ్ కోసం రూ.990) ఇస్తారు.
- ఈ పథకం పేద ప్రజలకు వరం లాంటిది.
- దీని ద్వారా పొయ్యి ఊది కష్టపడేవారికి, కట్టెలు మోసేవారికి విముక్తి లభించింది.
- ఈ పథకం ద్వారా గ్రామీణ మహిళల ఆరోగ్యం మెరుగుపడింది.
ఉజ్వల కనెక్షన్ కోసం e-KYC తప్పనిసరి
ప్రధాన మంత్రి ఉజ్వల యోజన కింద గ్యాస్ కనెక్షన్ కోసం తప్పనిసరిగా e-KYC చేయించుకోవాలి. ఇందుకోసం బ్యాంక్ ఖాతా నంబర్, IFSC కోడ్, BPL సర్టిఫికేట్ లేదా SECC జాబితాలో పేరు అవసరం అవుతాయి. (అస్సాం, మేఘాలయా రాష్ట్రాలకు చెందినవారికి KYC అవసరం లేకుండానే ఉజ్వల కనెక్షన్ ఇస్తున్నారు)
ప్రధానమంత్రి ఉజ్వల యోజనకు కావలసిన పత్రాలు:
- ఆధార్ కార్డు
- నివాస ధృవీకరణ పత్రం (ఆధార్ కార్డులో అదే చిరునామా ఉంటే అవసరం లేదు
- పాస్పోర్ట్ సైజు ఫోటో
- రేషన్ కార్డు
- కుల ధృవీకరణ పత్రం
ప్రధాన మంత్రి ఉజ్వల యోజనకు ఎలా దరఖాస్తు చేయాలి?
ఆన్లైన్ విధానం:
స్టెప్-1:
- ఉజ్వల యోజన అధికారిక వెబ్సైట్కు (https://pmuy.gov.in//) వెళ్లండి.
- “Apply for New Ujjwala 2.0 Connection“పై క్లిక్ చేయండి.
- మీరు ఏ గ్యాస్ ఏజెన్సీ ద్వారా ఉజ్వల కనెక్షన్ తీసుకోవాలనుకుంటున్నారో దాన్ని ఎంచుకోండి. (Indane, Bharat Gas, HP Gas లలో మీరు ఏదైనా ఎంచుకోవచ్చు)
స్టెప్-2:
- మీరు ఏ ఏజెన్సీని ఎంచుకున్నారో, దాని కోసం రిజిస్ట్రేషన్ చేసుకోవాలి. మీ పేరు, మొబైల్, ఇ-మెయిల్ వివరాలను నమోదు చేసి రిజిస్టర్ చేసుకోండి.
- రిజిస్ట్రేషన్ తర్వాత, మీ మొబైల్ నంబర్, పాస్వర్డ్తో లాగిన్ అవ్వండి.
స్టెప్-3:
- మీ రాష్ట్రం, జిల్లా, పిన్ కోడ్, ఏజెన్సీ పేరును ఎంచుకోండి. e-KYC ప్రక్రియను పూర్తి చేయండి. మీ రేషన్ కార్డు, కుటుంబ సభ్యుల వివరాలను నమోదు చేయండి. మీకు ఏ సిలిండర్ కావాలో ఎంచుకోండి. బ్యాంక్ ఖాతా నంబర్, IFSC కోడ్ వివరాలు నమోదు చేయండి.
- రిఫరెన్స్ నంబర్ను సేవ్ చేసి, దరఖాస్తు ఫామ్ ప్రింట్ అవుట్ తీసుకోండి.
- ఫామ్, ఇతర అన్ని డాక్యుమెంట్లను తీసుకొని ఏజెన్సీకి వెళ్లి కలవండి.
ముఖ్యమైన ఫామ్స్ డౌన్లోడ్:
Ujjwala-KYC_English
Supplementary KYC
Self Declaration form
Mechanics Pre-Installation check of Customers Premises for LPG connection
ఆఫ్లైన్ విధానం:
- ఇంటర్నెట్ నుంచి ఉజ్వల యోజన KYC ఫామ్ను డౌన్లోడ్ చేసుకోండి.
- Annexure I Self Declaration Form, Annexure II Mechanic Pre Installation చెక్ ఫామ్లను కూడా డౌన్లోడ్ చేసుకొని నింపండి.
- దరఖాస్తు ఫామ్లో వివరాలను జాగ్రత్తగా నింపండి. బ్యాంక్ ఖాతా వివరాలను నమోదు చేయండి.
- పూర్తి చేసిన దరఖాస్తు పత్రంతో పాటు, ఇతర ముఖ్యమైన పత్రాలను జత చేయండి.
- దగ్గరలోని LPG డిస్ట్రిబ్యూటర్ వద్దకు వెళ్లి ఆ ఫామ్ను సమర్పించండి.
ఉజ్వల యోజన కోసం గ్యాస్ ఏజెన్సీ చిరునామా ఎలా తెలుసుకోవాలి?
మీరు ఉజ్వల యోజన పథకం కింద దరఖాస్తు చేసుకునేందుకు మీకు దగ్గరలోని గ్యాస్ ఏజెన్సీ చిరునామా తెలుసుకోవాలనుకుంటే, ఆ సమాచారం ఆన్లైన్లో లభిస్తుంది.
- అధికారిక వెబ్సైట్ (https://pmuy.gov.in/) హోమ్ పేజీలో “Where to Apply for LPG Connection” కేటగిరికీ వెళ్లండి.
- అక్కడ మీకు Indane, Bharatgas, HP Gas బటన్లు కనిపిస్తాయి. మీకు ఏ గ్యాస్ ఏజెన్సీ కావాలనుకుంటే దానికి ఎదురుగా ఉన్న “Locate Us” బటన్పై క్లిక్ చేయండి.
- మీ రాష్ట్రం, జిల్లాను ఎంటర్ చేయండి. అప్పుడు మీ జిల్లా పరిధిలో ఉన్న ఆ గ్యాస్ ఏజెన్సీల చిరునామాలు అన్నీ అక్కడ కనిపిస్తాయి.
- మీకు దగ్గరగా ఉన్న ఏజెన్సీ చిరునామాను తెలుసుకొని, కార్యాలయంలో సంప్రదించండి..
రీఫిల్ బుకింగ్ కోసం నంబర్లు
ఎస్సెమ్మెస్ పంపాల్సిన నంబర్: 7718955555
మిస్స్డ్ కాల్ నంబర్: 8454955555
వాట్సప్ నంబర్: 7588888824
ఉజ్వల యోజన (PMUY) కింద రీఫిల్ బుకింగ్ ఎలా చేయాలి?
ఉజ్వల యోజన అధికారిక వెబ్సైట్కు వెళ్లండి. ఆన్లైన్ సేవల్లో “Refill Booking” కనిపిస్తుంది. దీనిపై క్లిక్ చేస్తే.. రీఫిల్ బుకింగ్ చేసుకునేందుకు సంబంధించిన నంబర్లు కనిపిస్తాయి. మిస్స్డ్ కాల్, ఎస్సెమ్మెస్ లేదా వాట్సప్.. ఈ మూడింటిలో దేని ద్వారా అయినా సిలిండర్ బుక్ చేసుకోవచ్చు. భారత్ గ్యాస్, హెచ్పీ గ్యాస్, ఇండేన్ గ్యాస్.. వీటిలో ఏ గ్యాస్ అయినా ఈ కామన్ నంబర్లతో బుకింగ్ చేసుకోవచ్చు. రీఫిల్ బుక్ అయిన వెంటనే.. భారత్ బిల్ పే సిస్టమ్ (BBPS) ద్వారా బిల్ పే చేసుకోవచ్చు. అమెజాన్, పేటీఎం ద్వారా కూడా ఈ బిల్లు చెల్లించవచ్చు.
ఉజ్వల యోజన కింద గ్యాస్ సిలిండర్ సబ్సీడీ డబ్బు ఎలా వస్తుంది?
ఉజ్వల యోజన కింద గ్యాస్ సిలిండర్కు సంబంధించిన సబ్సీడీ మొత్తం డైరెక్ట్ ట్రాన్స్ఫర్ (Direct Benefit Transfer) ద్వారా నేరుగా లబ్ధిదారుల బ్యాంక్ ఖాతాలో జమ అవుతుంది. మీరు రూ.900 లకు గ్యాస్ సిలిండర్ను కొనుగోలు చేస్తే, ఒక్కో సిలిండర్కు రూ.550 కంటే ఎంత ఎక్కువ డబ్బు చెల్లించారో, ఆ డబ్బు బ్యాంకు ఖాతాలో జమ అవుతుంది. సంవత్సరానికి 12 సిలిండర్లకు ఈ సబ్సీడీ వర్తిస్తుంది. మీరు గ్యాస్ సిలిండర్ అందుకున్న తర్వాత సబ్సీడీ మీ ఖాతాలో జమ అవుతుంది. ఒకవేళ ఏవైనా ఇబ్బందులు తలెత్తితే, టోల్ ఫ్రీ నంబర్కు కాల్ చేసి ఫిర్యాదు చేయవచ్చు.
కేంద్ర కేబినెట్ 2025 ఆగస్టు 8న పీఎం ఉజ్వల యోజన (PMUY) పథకాన్ని కొనసాగించేందుకు ఆమోదం తెలిపింది. ఈ పథకం కింద 2025-26 ఆర్థిక సంవత్సరానికిగాను రూ. 12,060 కోట్లు కేటాయించింది. ఈ నిర్ణయంతో దేశంలోని దాదాపు 10.33 కోట్ల కుటుంబాలకు లబ్ధి చేకూరనుంది. ఈ పథకం కింద 45 కోట్ల మంది ప్రయోజనం పొందుతారని కేంద్రం చెబుతోంది. గతంలో (UJJWALA 2.0) ఈ పథకం కోసం దరఖాస్తు చేసుకొని, గ్యాస్ కనెక్షన్ పొందని వారి అప్లికేషన్లను పరిశీలించి, ఈసారి లబ్ధి చేకూరుస్తామని కేంద్రం తెలిపింది.
