కేంద్రం సూపర్ స్కీమ్ :
బిడ్డ పుట్టిన క్షణం నుండి తల్లిదండ్రుల ఆలోచనలన్నీ వారి భవిష్యత్తు చుట్టూనే తిరుగుతుంటాయి. పెరిగి పెద్దయ్యాక వారి ఉన్నత చదువులకు, కలలకు ఆర్థికంగా ఎలాంటి లోటు రాకూడదని ప్రతి ఒక్కరూ కోరుకుంటారు. అచ్చం అలాంటి తల్లిదండ్రుల కోసమే కేంద్ర ప్రభుత్వం NPS వాత్సల్య అనే అద్భుతమైన కానుకను అందించింది. ఈ పథకం ద్వారా ఏకంగా రూ.68లక్షలను కూడబెట్టొచ్చు.
పిల్లలు పుట్టినప్పటి నుండి వారి చదువు, పెళ్లి, సెటిల్మెంట్ గురించి తల్లిదండ్రులు ఆలోచిస్తూనే ఉంటారు. అయితే పెరుగుతున్న ద్రవ్యోల్బణం దృష్ట్యా, భవిష్యత్తులో ఉన్నత చదువుల ఖర్చు ఊహించని స్థాయికి చేరుకోనుంది. ఇలాంటి తరుణంలో చక్రవడ్డీ శక్తిని ఉపయోగించుకుని, చిన్న మొత్తాలను భారీ సంపదగా మార్చేందుకు కేంద్ర ప్రభుత్వం ఎన్పిఎస్ వాత్సల్య పథకాన్ని అందుబాటులోకి తెచ్చింది. ఇది కేవలం ఒక సేవింగ్స్ అకౌంట్ మాత్రమే కాదు, ఇది ఒక దీర్ఘకాలిక సంపద సృష్టి సాధనం. పెన్షన్ ఫండ్ రెగ్యులేటరీ అథారిటీ ఆఫ్ ఇండియా ఆధ్వర్యంలో నడిచే ఈ పథకం, మైనర్ల కోసం ప్రత్యేకంగా రూపొందించారు. భారత పౌరుడైన ఏ బిడ్డ పేరు మీదనైనా వారి తల్లిదండ్రులు లేదా సంరక్షకులు ఈ ఖాతాను తెరవవచ్చు.
18 ఏళ్లకే రూ.68లక్షలను కూడబెట్టొచ్చు :
మీరు చేసే చిన్న పెట్టుబడి మీ బిడ్డకు 18 ఏళ్లు వచ్చేసరికి ఎంత పెద్ద మొత్తంగా మారుతుందో చూద్దాం
నెలవారీ రూ. 5,000 పెట్టుబడి : మీ బిడ్డ పుట్టిన నెల నుండే ప్రతి నెలా రూ.5,000 డిపాజిట్ చేస్తే, 18 ఏళ్లు నిండేసరికి రూ.34.22 లక్షల భారీ నిధి సమకూరుతుంది.
నెలవారీ రూ. 8,000 పెట్టుబడి: ఒకవేళ మీరు నెలకు రూ. 8,000 పొదుపు చేయగలిగితే, మీ బిడ్డ యుక్తవయసులోకి వచ్చేసరికి ఆ మొత్తం రూ. 54.75 లక్షలకు చేరుకుంటుంది.
నెలవారీ రూ. 10,000 పెట్టుబడి: మొదటి నెల నుండే రూ.10,000 పెట్టుబడి పెడితే, 18 ఏళ్ల వయసులో ఆ బిడ్డ చేతిలో రూ. 68.44 లక్షల సంపద ఉంటుంది.
ఈ మొత్తం మీ బిడ్డ విదేశీ చదువులకు, స్టార్టప్ ప్రారంభించడానికి లేదా వివాహ ఖర్చులకు కొండంత అండగా నిలుస్తుంది.
తల్లిదండ్రులు ఎందుకు ఈ పథకాన్ని ఎంచుకోవాలి?
- నెలనెలా చిన్న మొత్తాలను కేటాయించడం వల్ల ఆర్థిక క్రమశిక్షణ అలవడుతుంది.
- PFRDA నియంత్రణలో ఉండటం వల్ల మీ డబ్బు సురక్షితంగా ఉంటుంది.
- మీ ఆర్థిక స్థితిని బట్టి పెట్టుబడి మొత్తాన్ని పెంచుకునే లేదా తగ్గించుకునే అవకాశం ఉంటుంది.
- తల్లిదండ్రులు ఖాతా నిర్వహించినప్పటికీ ఆ డబ్బుపై పూర్తి హక్కు కేవలం బిడ్డకు మాత్రమే ఉంటుంది
18 ఏళ్ల తర్వాత అద్భుతమైన మలుపు :
చాలా పథకాలు పిల్లలకు మేజర్ వయసు రాగానే ముగిసిపోతాయి. కానీ, NPS వాత్సల్య అక్కడితో ఆగదు. బిడ్డకు 18 ఏళ్లు నిండగానే ఈ ఖాతా దానంతట అదే సాధారణ NPS అకౌంట్గా మారిపోతుంది. ఒకవేళ ఆ యువతీయువకులు తమ కెరీర్ ప్రారంభంలో కూడా ఈ పెట్టుబడిని కొనసాగిస్తే, 60 ఏళ్ల వయసు వచ్చేసరికి చక్రవడ్డీ ప్రభావంతో వారు కోటీశ్వరులు అయ్యే అవకాశం ఉంటుంది. అంటే చిన్నప్పుడు మీరు వేసిన పునాది, వారి వృద్ధాప్యం వరకు ఆర్థిక భరోసానిస్తుంది.
